الشتاء قادم ..

لا أعرف لماذا هذا الشعور المنفر الذي ينتابني كلما اقترب الشتاء

! أو شعرت بأحد مظاهره تستعد لتأتيني محملة بما لا أطيقه لقد اكتشفت مؤخرا أني كائن صيفي للغاية

أعشق الشمس وحرارتها وذلك الشعاع الدافئ المتسلل إلى أعماق قلبي ونورها الساطع الذي يضيء حياتي فمهما بلغت شدة حرارتها فانا طبعي " ناري " لا أخاف الاحتراق بنورها .. فانا أحبها ولكني أخاف الشتاء .. أجده حزينا يزيد فوق حزني حزنا .. مهموما وغائما ، مظلم وكئيب .. ذلك اللون الرمادي الموحد الذي يضفيه على الأجواء سواء نهارا ، ظهرا أو عصرا لا فارق فكلهم "رماديين أكره كثيرا كلمة " شديد البرودة ليلا " التي اسمعها في الأرصاد أو اقرأها في الصحف ! اكره البرد واكره الليل كل عام أقول لنفسي " أتمنى أن يصبح الشتاء قصيرا " اكره هذا الألم الذي أشعر به في أطرافي البرودة تتسلل إلى داخلي ولا تزيدني إلا حزنا ووحدة أتذكر عندما كان يقول لي من يحبون الشتاء انه جميل ورومانسي وهادئ ولكني لا أستطيع أن أرى وجه الجمال في ذلك الجو الغائم اتذكر ايضا عندما يقولون لي انهم يحبون المطر ..معللين حبهم بكلمات غريبه وانا انصت لهم باندهاش ويقولون

بصي الناس مبتسمة أزاي ؟ صاحيين بردانين وبيتنططو من البرد لكن برضو مبتسمين بيحبو يلعبو في المطر !! البرد بيخلي شكلهم حلو لكن الحر بيديهم ملامح الزهق والتعب والأرف فأهمس لنفسي :

 بس دة مش سبب كفاية عشان أحب الشتا

:)

فقاعات

رغبة ملحة وغريبه بنفس الوقت .. تراودني منذ فترة ..

أن العب .. بــ الماء و الصابون !!!

نعم .. أريد أن أصنع فقاعات صابون كبيرررررة

.. وأتابع تطايرها .. في الهواء

وأن اطلق عليها أسمـــاء "أرواح" خذلتني

وأتابع "انفجارهم" في الهواء ...

بصمـــــــــت

...

اشكو نفسي

أشعر أن الحياة تمر والأيام تتسرب من بين أصابعي

دون أن أستفيد منها شيئا المشكلة أنني أعلم تماما ما يجب علي فعله لأملأ حياتي ولأخرج من شرنقة هذا الروتين الخانق

الذي أغرق فيه لكن الغريب هو أني رغم علمي التام بما يجب علي فعله لكنني كالمنومة مغناطيسيا لا أفعل شيئا من ذلك.

لذا أنا اليوم هنا أشتكي نفسي لنفسي علها إذا قرأت هذا الكلام تستحي على دمها وتغير نمط حياتها

ربما ..

من يدري

!!!

أحبها أم ارتاح معها

" أنا مراتي مش اكتر واحدة حبيتها بس هي اكتر واحده ارتاح معها "
كلمات واقعية اسمعها كثيرا من العديد من الرجال ! لا أستطيع أن أعمم

ولكنها موجودة بنسبه كبيره فنادرا ما يتزوج الرجل من المرأة التي أحبها أو تمنى الزواج منها

مع مرور الأيام وتغيير الظروف وفرض الأمر الواقع لواقعيته على الجميع يجد الجميع أنفسهم

أمام اختيار الزواج من امرأة يرى أنها ستشاركه حياته وتناسبه ويرتاح لوجودها جواره

وربما أيضا يحبها بعد ذلك
ولكن مع الفارق ..
فهو يملأ حياتها بكلمات الحب والإعجاب ولكنه في قراره نفسه

يعرف أنها ليست " حب عمره " ولكنة " مرتاح معها " ويشعر بالأمان أو الاستقرار في بيته
ما معنى مرتاح معها ؟؟
هل لأنها تريحه وتجيب كل طلباته؟ هل لأنها مسئوله عن أكله وشربه وملبسه وخدماته ؟

هل هي موائمة لطباعه الشخصية ؟ هل تستطيع فقط أن تتحمله في كل أحواله وتتأقلم معه بشكل جيد
هل لأنها تضحي من اجله ؟ أو تدفعه للنجاح ؟ أو ربما تريده في أفضل حال ؟

هل تقف إلى جانبه ؟ أو لأنها تقوم بعمل جيد في تربية أولاده وتلبية احتياجاته ؟

أم لأنه يستطيع أن يتحدث معها دون قيود أو خوف أو تردد ؟
هل معناه انه يثق بها ويحملها مسؤولية بيته واسمه وأولاده ؟
هل هذا معنى انه مرتاح معها ؟؟
هل تتخيلون موقف الزوجة التي تعتقد أنها حياته – حتى ولو كانت تعلم بعلاقاته السابقه

او حبه السابق – بينما الحقيقة شيء آخر الحقيقة انها الصوره وليست الأصل

محاوله الاستمرار وليست الحياة ..إنها الراحة والسكينة وليست العشق والهوى

مسكينة تلك الزوجة إذا كانت تعرف وتحاول إقناع نفسها فقط

" عشان تعيش "

! ومسكينة إذا كانت مخدوعة وتظن إنها بمكانة شخص آخر
! أغلب الظن أنه في مكان ما الآن يمثل نفس الدور ويحتل نفس المكانة

ايام منحوسة ..

اشعر بالنحس يلازمني في كل شئ طيلة هذه الايام
على جميع المستويات الشخصي والمهني والعائلي والمادي والمعنوي

كل شئ وأي شئ
يمين شمال
فوق تحت
بره وجوه
خاص وعام
قريب و بعيد
هنا او هناك
دائما وابدا
لا يخلو بالي من كلمات يرددها بشكل مستمر عن قلت البخت

وأجدني وبشكل تلقائي غير مقصود التفت لجميع الامثال الشعبيه المختصة بهذا المجال
واللي مفيش اكتر منها بالمناسبة اكتشفت ان التراث زاخر بقلت البخت مش عارفه ليه
دائما اردد عبارات

هو مفيش غيري انا
مين اللي داعي عليا
وافكارغيرها كثير لا تفارق خيالي ...

ايه قلت البخت اللي ملزماني دي

جاتلي منين وليه
وامتى هتروح بقى ؟؟

وهو في حاجة اسمها بخت اصلا

انا لم اكن من المؤمنين بالحظ في كل الاحوال

اجده شيئا سخيفا يلصق به الناس نجاحاتهم الغير متوقعه او حتى فشلهم الغير متوقع

ولكن انا لم اتوقع شيئا ولا اسعى لنجاح او فشل

انا فقط لا استطيع ان اقوم بالامور الحياتيه الاعتيادية بشكل طبيعي

كلها منحوسه

كلها عطلانه

كلها مبتخلصش

وبتفقر وتعقرب وتعصلج

و... كل ما شئت من مصطلحات

لا اصدق من يتحدثون عن النحس ولا احب ان اشعر به

ولكن ما اعانيه يوميا لا يمكنني ان اجد له وصفا في القاموس سوى هذه الكلمه الحمقاء

والتي بالمناسبه لم اكن اعرف تفسيرها حتى بدأت تلازمني منذ مدة

اشعر بهذا النحس فعلا ولكني فقط لا اريد ان اعترف به
انا زهقت .. رحمتك يارب

:S

انا بس متضايق

قرأت انه إذا وجدت نفسي غاضبة أو حزينة فجأة بلا سبب

فلابد أن شيئا صغيرا حدث ضايقني أو أحزنني

ولكني لم انتبه له في حينه ثم تلاه شيئا صغيرا آخر

فلم أعطه اهتماما وهكذا تتوالى الأشياء الصغيرة

حتى تتراكم لتجعلني الآن في قمة الغضب والحزن دون أن أشعر
لقد قررت أن أخوض التجربة وأراجع كل ما حدث

وأدون كل ما اعتقد انه أزعجني في الأيام الماضية

علني اصل إلى هذا الشيء الصغير الذي يجعلني الآن أكاد انفجر

لا اعلم مدى نجاح تلك الفكرة أو حتى ما أهميتها في علاج المشكلة

ولكني قررت فقط أن اعرف السبب ليبطل العجب

!!
ثم يأتي الحل أو لا يأتي " دة موضوع تاني " ربما لا جدوى من ذلك بالأساس

ولكني سأجربه على كل حال

هو احنا بنشتغل ليه ؟

طبعا انتو عارفين ان اغلب الستات دلوقتي بتشتغل زيها زي الرجالة رغم انهم بين قوسين على ذمة رجالة
خلينا صريحات مع انفسنا احنا بنشتغل ليه ؟
احب اوضح شئ مهم وهو ان الست العاملة بين قوسين المتزوجة

مش بتشتغل عشان تساعد جوزها في مصاريف البيت واعباء الحياه
الا من رحم ربي يعني مش عايزة اعمم لان برضو في ستات بتساعد وتحسب لها
ولكن في الغالب قصة المساعدة دي اشاعة واكذوبة كبرى

الست دلوقتي بتشتغل عشان حاجة مختلفة تمام الاختلاف وبعيدة تمام البعد عن حكاية التعاون الاسري دي
الست بتشتغل عشان تساعد نفسها وعشان يكون ليها شخصية مستقلة ومصدر رزق ودخل ثابت

امان ليها من غدر الزمن اللي ياما شافت وسمعت ويمكن عاشت منو كتير
والمقصود هنا بغدر الزمن هو غدر الزوج في اغلب الاحوال

وبرضو ابتعد عن التعميم نظرا لقله تانيه بيغدر بيها الزمن بشكل اخر

زي وفاه الزوج او ابتلاء من الله وغيرها

انتو عارفين طبعا ان الست شايفة ان العمل بالنسبة لها قوة واستقلال
زمان كانت الست بتتجوز عشان تلاقي راجل تعتمد علية وقت الشدائد
وتحتمي به حتى امثال زمان كانت موحية بذلك وتدل على ذلك زي ضل راجل ولا ضل حيطة

هي كانت شيفة كدة انو لابد من وجود الرجل حتى لو كان هذا الرجل حيطة مايلة

مش مهم المهم يكون موجود وخلاص
كانت الست بتفرح اوي انها في عصمة راجل يحميها من الحاجة والعوز

لكن الوضع اتغير ومبقناش زي زمان ليه ؟؟

لان الرجل لم يعد الامان بالنسبة للمرأه امان منين وهي شايفه انو بيتجوز عليها بدل الواحدة تلاته

دة لو كان يعني يعرف ربنا وبلاش نخوض في عك اللي ميعرفهوش
وممكن يستغنى عنها في اي وقت هو يحبو ويديها استماره سته ويقلها شكرا انا نفسي موعت وعايز اغير
او معلش انا كنت فاكر اننا لايقين لبعض بس بعد كل العشره دي

!اكتشفت اني مش قادر اعصر على نفسي لمون اكتر من كدة
او يقول لها ان مهمتك انتهت لحد كدة ونشكركم على حسن تعاونكم

سواء كانت المهمة دي الامتاع او انجاب الاطفال في وقت كان لابد من هذا او ذاك
تعمل ايه الست في الحالة دي تشحت ولا تجوع ولا تنحرف ؟؟

تحس بالامان ازاي اذا كان كل الرجالة عينها زايغة ويندب فيها رصاصة ومبيعجبهمش العجب

برضو هرجع اقول مش هعمم لان في رجال محترمين جدا
ولا اقصد بمحترمين ان عينهم مش زايغه لا قدر الله لان دي حاجة في دمهم لا استثني منها احدا
ولكن المحترم في نظري هو اللي نسبة زيغان عنيه اقل بكثيييييير من اقرانه الاخرين

اوعلى الاقل لدية القوة والقدره على السيطرة عليها بشكل لائق ومحترم
وغالبا الشماعة الرئيسية لزوغان عنيهم هي ان الست نفسها السبب ومهمله في نفسها وفيه
طبعا مش هعترض لان اغلبهم معاهم حق وانا كبنت اقر واعترف وممكن تسجلولي كلامي

ان اغلب الستات بعد الجواز بتبقى عايزة تتف عليها
ليس لشئ غير انها خلاص بذلت كل مجهودها في العنايه في السنوات السابقة حتى توقع العريس في شباكها
ومن اجل ذلك بذلت كل الغالي والنفيس لتكون في اجمل صوره ويعجب بيها كل الرجاله الرايحه والجايه
وعندما تتزوج فانها تحمد الله على انها وصلت لنهاية المطاف ونجحت في مهمتها فتبدأ بالاهمال والتناحة

وبالتالي يلجأ الرجل للاخريات اللي لسه بيمارسو الخطة اياها

مع العلم انو مجرد ما يتجوز اي وحدة من اللي عاجبينو دول فانها ستكون نسخه طبق الاصل

من مراتو المنكوشه اللي وقفه في المطبخ
واعتقد كل الرجالة عارفين كدة كويس ومع ذلك برضو بيبصبصو فهمه حرين بقى

اغلبهم اكتفى بالبصبصه اساسا وقال بلاش من الجواز لانه بيدمر الحجات الحلوة اللي بنشوفها
المهم بعد الاعتراف الخطير دة نرجع للستات اللي بجد الكويسين اللي عاملين اللي عليهم وزيادة وهمه قله انا عارفه

بس هل يسلمن من بصبصة الرجالة ؟؟
يعني ست قايدة صوابعها العشره شمع ومقضية وموفيه هل تشعر بالامان من خيانه زوجها ؟؟

برضو هقلكم لا ..لان شماعة الاهمال وان كانت صحيحة
الا ان الرجل بطبعه بصباص زي ما قلنا تقلي ازاي ومراتو زي القمر

اقلك دور على كل النماذج اللي اتجوزو ستات حلوين اووووووي وبعد شوية راقب الموقف
هتلاقي يا اما زهق يا اما ااتعود على جمالها واصبح شئ عادي بالنسبالو يااما عندو معاها مشاكل تانيه ملهاش علاقه بالشكل والاهتمام وعموما والراجل بطبعو يحب التغيير

! حتى لو متجوز انجيلينا جولي هيزهق يعني هيزهق اكيد مهو مش اجدع من براد بيت

اذن احتمال انو يسبها قائم وصحيح ميه في الميه مهما كانت او عملت
طب والحل يعني مفيش فايدة مهما عملنا برضو مفيش امان ؟؟
اي نعم مفيش فايدة
وبالتالي فان الامان الوحيد لكل الست هو في الوظيفه والعمل ... يااااه

هو احنا كنا بنتكلم اصلا على عمل المرأه والله نسيت

:D
نرجع تاني لموضوعنا وهو ان العمل مصدر الست الوحيد في الاستقلال والشعور بالامان

وغير كدة محدش يقنعني انها بتكافح عشان خاطر المحروس جوزها وبيتها وولادها

والا كانت ممكن تقعد في البيت وتكافح بطرق تانية وتربي العيال وتخلي بالها منو وتدير شوؤن بيتو

في دة اكبر كفاح اصلا بس لو الناس تفهم

ثم ان لو جيتو للحق يعني الستات بتهرب من شغل البيت ومسؤلياتو لانها في وجهه نظري المتواضعة

أكبر بكتير من مسؤليات اي شغل بره حتى لو كان رئاسه الوزراء

فعشان كدة بتحتمي السيدات في مظله العمل من اعباء البيت والاولاد وتبدأ تدور

على شغاله ومدرسه ومربيه وطباخ وسفرجي وغيرها من الشغلانات

اللي كانت حضرتها مفروض تقوم بيها بالاساس ولكنها بتستسهل ! وطبعا وقتها

هيكون ليها حجة مقنعه عشان تطلب تجيب كل دول

!!
وتلاقي الست من دول اول ما تقلها خلاص انا قادر اني اشيل البيت واكفيه ماديا اقعدي انتي بقى وبطلي شغل

تقلك لا اصل محتاجين ندخل الولاد مدارس لغات بدل العربي ومحتاجين عربيه لكزس بدل التويوتا
وهي كل اللي محتاجاه انها تفضل امراه عاملة مش اكتر ولا أقل
ولو يعني كانت من الستات اللي مش فارق معاهم نوع العربية اوي فهتسمع وقتها اسطوانه حرية المرأه

وانت كدة بتلغي شخصيتي وكياني في المجتمع وشهادتي وانا اتعلمت عشان ايه

! وجملتين مجعلصين من دول كفيلين بانهاء الموقف
اعترفو يا ستات وبلاش مقاوحة

وانتو يا رجالة اعدلو حالكم اللي بقى زي الحيطة المايلة

لان زمان كنا بنرضى بالحيطة المايله لمجرد انها تدارينا
دلوقتي الحيطة المايلة ببساطة متلزمناش

!!